А там коло річкы, а там коло броду,
Кличе младый шугай дівчатко по воду.

Не піду, не піду, мой шугай, по воду,
Бо я молоденька, обмовы ся бою.

Не бійся, дівчатко, не бійся ничого,
Шугай молоденький, не зробит нич злого.

Дві ночкы не спала, на трету заснула,
Шугай поціловал, дівчына не чула.

Дівчынонці снится, же горлица бьеся,
Шугай коло боку лежыт и смієся.

На же ти, дівчатко, два златы на мыло,
Два златы на мыло, два златы на пиво.

Мылом вымывайся, пивом напивайся,
Жебы мама не знала же-с з шугайом спала.

Мылом ся вмывала, пивом ся впивала,
На шесту неділю мамичка познала.

Дівко, моя дівко, што ты наробила,
Же ты всю родину во вік засмутила.

Засмутила-м отца, засмутила-м матер,
Засмутила-м того, што мене мал взяти.

Не добре мні было косоньку чесати,
То мі добре тепер дитя колысати.

А тепер ты, дівко, ни жена, ни дівка,
Лем ты, моя дівко, світова вандривка.

Як бы-с была дівком, косу бы-с чесала,
Як бы-с была женом, та бы-с мужа мала.