Грают, бубнуют,
А ми ищы пиєме,
Мам я фраєречку,
В цисарском домичку,
Добри о ней знам.

Добри я о ней знам,
Покаль я єй в ручках мам,
Як єй з ручок пущу,
Домов ся поврачу,
Помож боже сам.

Помож боже на небі,
Бо я иду ку тобі,
Днеска коня кую,
Заран машерую,
До Тарнополя.

З Тарнополя до Турка,
З Турка до Францен-бурга,
Там буду воював,
Свою кров проливав,
За вас дівчата.

Отпала мні шабличка,
От лівого бочечка,
Под мні подай мила,
Кед-єс справедлива,
Горе на коня.

Я бым ти єй подала,
Жебы-м ся не бояла,
Подам ти шабличку,
Зотнеш мні главичку,
Ганьба бы была.

Ганьба бы была,
Отцу а и матери,
Же мня єдну мали,
За муж мня не дали,
Ганьба бы была.