В зеленом гаю

В зеленом гаю,
Древко рубают,
Аж до Дунаю,
Трискы падают.

Падают велькы,
Падают малы,
Ид их позберай,
Дівчатко шварне.

Ид их позберай,
Наклад з них огня,
Выпер милому
Кошелю до дня.

В пятницю зваряй,
В субботу выпер,
А в неділю рано
Милого прибер.

В неділю рано,
Як солнце всходит,
Уж мой миленкий
Под перком ходит.

Не так под перком,
Як под трусовым,
Под капелюхом,
Под калиновым.
Джерело:
Лемковскы народны співанкы. – Клівленд: Типографія Лемко-Союза, 1935. – 64 с.

Рекламне оголошення