Чом ваше окенко

Чом ваше окенко
Красно малюване?
Бо в него миленкий, (2)
Хоц коли загляне.

Чом ваша заградка
Окописта квітя?
Бо то для дівчатка
Віночкы вывити.

Певно ты, дівчатко,
Добрі ся не чуєш,
Коли своє личко
Фарбами малюєш.

Добрі ся не чую,
Ни ся не малюю,
Лєм пью с зілєм воду
Та ся румянію!

Чом же ты, дівчатко,
Таке не веселе?
Бо и млин на муку,
Без воды не меле.

Ани ся не смучу,
Ни ся не веселю,
Лем ся так прохожу
Помеж ліс по полю.

Горы мои, горы,
Зелены дубравы,
Якы в нашых дівчат,
Премилены бровы!

Николи бы я Вас,
Не любил дівчата,
Як бы Вы не мали
Чорны оченята.

Та чого ж орати,
Чого ж боронити,
Чого же дівчатко
До слюбу змушати.

Ани ся мі не хваль,
Ни ся не преказуй,
Ни ся мні на очы
Веце не показуй.

Чом твоє серденько,
Для мене студене?
Таке саме твоє
Фальшыве для мене!

А в нашых Карпатах,
Прекрасны дівчата,
Хлопці их не любят,
Бо дуже завзяты!
Джерело:
Лемковскы народны співанкы. – Клівленд: Типографія Лемко-Союза, 1935. – 64 с.

Рекламне оголошення