Ой, мамцьо-мамцьо, мамичко

Ой, мамцьо-мамцьо, мамичко,
Єдну мня мате дівочку,
Добри вы собі подумайте!
За кого мене выдате?

Ой, мамцьо-мамцьо, мамичко,
Шумне то мено Яничко,
Ой шумне-шумне, шумне оно,
Дайте-ж вы мене за него.

Оженься Янчик, возми мня,
Буде з мня добра газдыня,
Буду ти кашу варила,
Пирогы маслом мастила.

Оженься Янчик, возми мня,
Буде з мня добра газдыня,
Постелю я ти перину,
Ляжеш сой сам в середину.

Зелена липка и явор,
Гдес ся Яничку забавил,
Забавил я ся в Тересы,
При молоденькой Марисі.
Джерело:
Лемковскы народны співанкы. – Клівленд: Типографія Лемко-Союза, 1935. – 64 с.

Рекламне оголошення