Недалеко млина

Недалеко млина стала ся новина,
Счарувала дівчынонька богацкого сына.

Як она го чарувала, кликала до хаты,
Прийди, прийди, мой миленький, штоси ти мам дати.

А пришол он до єй хаты, добрый день желає,
А она му до погара вина наливає.

До єдного вина, до другого пива,
Пийже-пийже, мой миленький, бо я уж выпила.

Пий же ты з єдного, я буду з другого,
А може-с ты наварила трутизны до него.

Хибаль бым я глупа была, розуму не мала,
Жебы-м свому миленькому трутизну давала.

Пришол Ванцьо до домоньку, сіл сой коло стола,
Мати ся го запытала, гдес был сыну вчера?

А был я там у Марисі, в Марисіной хаті,
Дала мені погар вина, мушу умирати.

Ушый ты мні, мамусь моя, білую сорочку,
Не проклинай мамцьо моя, мою фраєречку.
Джерело:
Лемковскы народны співанкы. – Клівленд: Типографія Лемко-Союза, 1935. – 64 с.

Рекламне оголошення