Як я ишол поза гумен

Як я ишол поза гумен,
Ищы не был день,
Встритил я там шварне дівча,
Што пололо лен.

Гей-же, гой-же, милый боже,
Мусиш моя быц,
Штож ти по мні, мой миленький,
Кед не знам робиц.

Єст там, єст там березина,
Попред нашы врата,
Научу я тя, моя мила,
Всякой роботы.

А ищы ты, мой миленький,
Не маш до мня нич,
А уж ся мня обіцуєш,
Березином биц.

А чом же ты, мой миленький,
Чом ты не ореш?
Ци ти волы звыставали,
Ци сам не можеш?

Орал бы я, мила моя,
Орал бым то я,
Жебы ты мні поганяла,
На убочы потримала,
Волів бым то я.

А я тебе, мила, не хцу,
Брудны ножкы маш,
А я тебе, милый, не хцу,
Бо ты в карты граш.

А скочу я до Дунаю,
Умыю ногы,
А ты програл три тысячы,
Будеш убогий.

А у мене три тысячы,
Были не были,
Ты голову не чесала,
Штыри неділи.

Не дозерай, мой миленький,
Мойой головы,
Запрягай ты штыри коні,
Иди до вдовы.

Там на горі при дубині,
Муруваный двор,
А в том дворі камениця,
Осідланый конь.

Под тым коньом,
Біла нога, срібрна подкова,
Котре дівча мня полюбит,
То буде моя.

Чого плачеш, чом нарічеш,
Чого тобі жаль?
Того вінка зеленого, (2)
Што ты мні го взял!

Чом же-с тогды не плакала,
Як я ти го брал?
Я мысліла, я гадала (2)
Же ты жартувал!
Джерело:
Лемковскы народны співанкы. – Клівленд: Типографія Лемко-Союза, 1935. – 64 с.

Рекламне оголошення